Click to listen highlighted text! GSpeech
A- A A+

Yangiliklar

ҲАР НАРСАДА ХОЛИСЛИК ЗАРУР

Кеча ижтимоий тармоқларда жамоат транспорти билан боғлиқ можараро акс этган видео тарқади. Унда ҳайдовчи ва чиптачининг кекса аёлга қўпол муомалада бўлиб, автобусдан тушириб юборганнини билдирувчи лавҳа намойиш этилган. Албатта, бу жамоатчилик ўртасида кенг муҳокаларга сабаб бўлди ва давом этмоқда. Оммавий ахборот воситаларида хабар берилганидек, бу воқеа “Тошшаҳартрансхизмат” АЖ раҳбарияти томонидан тезкорлик билан ўрганилди ва йўловчига қўпол муомалада бўлган ҳайдовчи ва чиптачига интизомий жазо белгиланди.
Албатта, тизимда қатъий тартиб-интизомни жорий этиш, хизмат сифати, йўловчилар билан муносабатни янада яхшилаш мақсадида бундай ҳунук воқеаларга нисбатан жамият бундай буён ҳам қатъий чора кўришни давом эттиради.
Аммо, танганинг иккинчи тарафи бўлганидек, масаланинг бошқа жиҳатига ҳам теран нигоҳ, соғлом ақл билан баҳо бериш лозим бўлади.
“Йўловчи назорати” ҳамда бошқа ижтимоий тармоқ ва каналларда бидирилган фикрлар, мулоҳаза ва таклифларда юқоридаги воқеа юзасидан аксарият инсонлар ҳайдовчи ва чиптачини қоралаган. Албатта, қўпол муомала қилгани учун улар тўла айбдор. Бироқ, қонуний нуқтаи-назардан (қўпол муомалани инобатга олмаганда) транспортчилар тўғри йўл тутган. Боиси, аёлнинг бу тарзда иш тутиши ён-атрофга салбий таъсир эта бошлаган. Бундан аввалги ҳолатларда унинг йўл ҳақини тўламаганлигини кўрган бошқа йўловчилар ҳам бундай “имтиёзга” ўзларини ҳам лойиқ, дея ҳисоблай бошлашган. Шундай бўлсада бундай вазиятда ҳайдовчи ва чиптачи аёлга қонун талабини ширин сўз билан тушунтиришлари лозим эди.
Хўш, агар масалага фақатгина инсонийлик, одамийлик принцплари билан ёндашсак, у ҳолда бу борада белгиланган меъёрлар, қонунчилик талаблари нима учун керак?
“Тошшаҳартрансзимат” АЖ да ташкил этилган 1062-ишонч телефони ҳамда бошқа тармоқлар орқали жуда кўп мурожаатлар келиб тушади. Уларнинг аксариятида йўловчилар чиптачининг 100 сўм қайтим бермаганидан норози бўлиб мурожаат қиладилар. Албатта, бу масалалар ҳам беэътибор қолдирилаётгани йўқ. Қатъий қарши чоралар сабаб қайтим қайтармаслик ва бошқа муаммолар кескин камайишига эришилмоқда.
Шундай экан йўловчи ўз ҳуқуқларини билгани ҳолда мажбуриятини ҳам унутмаслиги керак.
Дунёнинг исталган мамлакатига борманг йўловчининг бирламчи вазифаси йўл ҳақини ўз вақтида тўлаш — бу ўзгармас қонун. У ҳох пенсионар ҳох бошқа тоифадаги йўловчи бўлсин (агар имтиёзга эга бўлмаса) бу мажбуриятни адо этиши шарт.
Бунга амал қилмаганларга эса қонунда белгиланган тартибда чора кўрилади. Мисол учун билетсиз йўловчига Германияда 60 евро, Францияда 100-170 евро, Италия, Польша, Чехия мамлакатларида эса 100 евро миқдорида жаримага тортилади. Бизнинг мамлакатимизда эса Ўзбекистон Республикасининг Маъмурий жавобгарлик тўғрисидаги кодексининг 144-моддасига асосан “...шаҳар ичида ва шаҳар атрофида қатнайдиган автобусда чиптасиз юриш энг кам иш ҳақининг ўндан бир қисми миқдорида жарима солишга сабаб бўлиши белгилаб қўйилган.
Чиптасиз юришга уринган йўловчиларни тартибга солиш мақсадида бу ҳуқуққа эга бўлган аввалги “Ўзавтотранс” агентлигига (Ҳозирги Транспорт вазирлиги) ва унинг Тошкент шаҳар бошқармасига “Тошшаҳартрансхизмат” АЖ раҳбарияти томонидан бир неча бор мурожаат қилинган. Аммо, шу кунгача бу каби йўловчилардан умуман жарима ундирилмаган. Автобусларда чиптасиз юришга уринаётган йўловчилар ҳамон кўплаб учрамоқда.
Юқоридаги каби ҳолатлар сабаб жамоат транспортида фақат ҳайдовчи ва чиптачиларни айблайверсак, қонуний талабни қўлламоқчи бўлгани учун уларга чоралар кўраверсак, эртага бу соҳада меҳрини бериб халққа хизмат қиладиган инсон қолармикин?
Ҳайдовчи ва чиптачиларнинг касбий муомала маданиятини юксалтириш борасида жамият томонидан бир қатор амалий ишлар қилинмоқда. Буни мурожаат ва шикоятларнинг камайганлигида ҳам кўриш мумкин. Бироқ эндиликда йўловчи маданиятини ҳам юксалтириш вақти келмадимикин?! Қачонгача сабабу баҳоналарни рўкач қилиб белгиланган тартиб-қоидани четлаб ўтаверамиз?
Ҳар ҳолда бир масалани баҳолашда ва муносабат билдиришда унинг барча жиҳатларига эътибор берилса, тарозининг икки палласини тенг кўрилса ҳолисликка шикаст етмасди.

Абдулазиз Йўлдошев
мустақил журналист.

Shanba, 02 Mart 2019

ЙТХ бўйича кўрсаткичлар

IMG 20190227 104256 937

“Тошшаҳартарсхизмат” АЖ таркибидаги автобус саройлари ҳайдовчилари айби билан ўтган 2018 йилнинг январь ойида 28 та автоҳалокат юз берган бўлса, жорий йилнинг шу даврида бирорта ҳам бундай ҳолат қайд этилмади.
Автобус ҳайдовчиларининг йўл қоидаларини бузиш ҳолатлари 2018 йилнинг январь ойида 204 маротаба кузатилган. Жорий йил январда эса 9 та мана шундай коидабузарлик бўлган. Яъни, 195тага камайган.

Payshanba, 27 Fevral 2019

Замонга монанд тарзда шаҳримиз кундан кунга чирой очиб, яшариб бормоқда.

photo 2019 02 18 11 28 24

Замонга монанд тарзда шаҳримиз кундан кунга чирой очиб, яшариб бормоқда. Қаерга қараманг ўзгача ўзгариш ва янгиланиш, бунёдкорлик авжида. Турли савдо мажмуалари, турфа уй-жойлар барпо этилмоқда. Бу албатта, кишиларнинг дунёқарашининг ўзгаришига, ҳаётга бўлган қизиқишининг ортишига сабаб бўляпти.
Албатта бу жараёнда “Тошшаҳартрансхизмат” АЖ жамоаси ҳам пойтахт аҳолисига муносиб хизмат кўрсатиш ҳаракатида.
Бошланган ҳафта ҳам ана шундай эзгуликларга бой бўлсин. Биз билан бошлаган сафарингиз баракали ва ҳайрли ўтсин.

Dushanba, 25 Fevral 2019

Эълон

Илгари хабар берилганидек, “Тошшаҳартрансхизмат” АЖ га қарашли автосаройларга янги автобусларнинг келтирилиб, ҳаракат таркиби босқичма-босқич янгилаб борилмоқда. Хусусан, 4 автобус саройи тасарруфидаги 84–“Эркин қўрғони – “Обод турмуш” маҳалласи” йўналишига 10 та ўрта сиғимли SAZ LE 60 автобуслари бириктирилди. Янги автобуслар 13 февралдан йўналишга чиқади.
Бундан ташқари 7 автобус саройи тасарруфидаги 9т–“Чилонзор, 25-даҳа – Тошкент вокзали” йўналишига ҳам ҳудди шу русумдаги 3 та автобус қўйилди. Ушбу автобуслар бугундан йўналишда қатнай бошлади.

Seshanba, 12 Fevral 2019

"Тошшахартрансхизмат" АЖ маъмурий биносида хеч қандай ёнғин содир бўлмади

photo 2019 02 11 17 22 25

11 февраль куни эрта тонгда Олой бозори яқинидаги “Бай Мираж мебель” турк фирмаси жойлашган бинода ёнғин содир бўлганлиги хақидаги хабар ижтимоий тармоқларда турлича талқин этилмоқда. Хусусан, “Тошшаҳартрансхизмат” АЖнинг маъмурий биносида ёнғин келиб чиққани ҳақида асоссиз хабарлар тарқамода. Аслида ёнган бино “Тошшаҳартрансхизмат” АЖнинг асосий биноси билан ёнма-ён жойлашган. Ушбу бино жамият ҳисобида бўлгани билан узоқ йиллар аввал ижарага берилган. Шу боис ҳам мазкур бинонинг барча хавфсизлигига ижарачилар жавобгар ҳисобланади. Ёнғин сабаб жамиятнинг асосий маъмурий биносига ҳеч қандай зарар етмаган.

Dushanba, 11 Fevral 2019

Эълон

“ТОШШАҲАРТРАНСХИЗМАТ” АЖ ИШГА ТАКЛИФ ЭТАДИ
“Тошшаҳартрансхизмат” АЖ таркибидаги автосаройларга янги автобусларнинг келтирилиши қўшимча иш ўринларининг очилишига замин яратмоқда. Бу эса ўз-ўзидан ҳайдовчиларга бўлган талабни орттирмоқда.

Yakshanba, 03 Fevral 2019

ЯНГИ АВТОБУСЛАР САФИ ТОБОРА КЕНГАЙМОҚДА

man

Илгари хабар берилганидек, “Тошшаҳартрансхизмат” АЖ га қарашли автобус саройларига келтирилаётган янги автобуслар сафи тобора кенгайиб бормоқда. Шу кунгача юртимизда ишлаб чиқарилган 72 та ўрта сиғимли “SAZ LE 60” ҳамда 40 та катта сиғимдаги “MAN” русумли автобуслар олиб келинган эди. Куни кеча улар сафига яга 10 та “MAN” қўшилди.

Бу йилги режага кўра янги автобус келтирилиши давом этади. Шундан 30 та янги автобус февраль ва март ойларида олиб келинади.

Ушбу янги автобуслар “Тошшаҳартрансхизмат” АЖ талабига кўра ишлаб чиқарувчилар томонидан такомиллаштириб борилмоқда. Автобуслардаги ёнғинга қарши ишловчи ускуна, ногиронлар учун пандус, энг асосийси кондиционер жамият раҳбарияти талаби билан ўрнатилди.

Payshanba, 30 Yanvar 2019

ХИЗМАТ ЛИБОСЛАРИ ЧИРОЙЛИ ВА БЕЖИРИМ БЎЛИШИ ЛОЗИМ

Без имени 1

Мамлакатимизда олиб борилаётган кенг кўламли ислоҳотлар ҳеч бир соҳани четлаб ўтаётгани йўқ. Бугун атоқли ёзувчи Абдулла Қаҳҳор айтганидек ”Буниси катта, буниси кичик” деган масланинг ўзи қолмади. Кичик, деб қаралиб келинган масаларга ҳам бугун жиддий ёндашилмоқда.

“Тошшаҳартрансхизмат” акциядорлик жамияти тизимида олиб борилаётган қатор ижобий ўзгаришлар, саъй-ҳаракатлар ҳамшаҳарларимиз, йўловчиларни ҳам хушнуд этмоқда. Хусусан, пойтахтимиз кўчаларида янги, замонавий автобусларнинг тобора кўпайиб бораётгани, янгидан янги лойиҳаларни шаҳар жамоат транспорти тизимида амал қилаётгани, йўловчилар учун ҳам, жамоат транспорти ҳайдовчилари, ишчи-хизматчилари учун ҳам яратилаётган қулайликлар, табиийки, ҳар икки томонни бирдек қувонтиради.

Хабарингиз бор, Жамият ҳайдовчилари, чиптачилар, ишчи-ходимлар учун янгича дизайнда махсус кийим-кечак – хизмат либослари тикиш масаласи юзасидан изланишлар олиб борилди. Жамият раҳбарияти томонидан танлов ҳам эълон қилинди.

“Тошшаҳартрансхизмат” акциядорлик жамияти ҳайдовчилари, чиптачилар, уста – чилангарлар учун мавсумий кийим бошлар тикиш, буни Ўзбекистонимизнинг иқлим шароитини ҳисобга олган ҳолда амалга ошириш мақсад қилиб олинган эди.

“Тошшаҳартрансхизмат” АЖ ва “1-автобус саройи” МЧЖ таъсисчилигида ташкил этилган “АВТОТРАНСТИКУВМАШ” корхонаси бу ишларни амалга оширишни ўз зиммасига олган.

Танлов қандай ўтгани, ходимлар учун янги уни формалар нималари билан олдингиларидан фарқ қилиши ва тикув корхонасидаги бугунги аҳвол ҳақида корхона раҳбари Дилдора Туропова билан суҳбатлашдик.

– Биз ҳайдовчи, чиптачи ва чилангарлар учун қулай хизмат либослари етказиб бериш учун анча меҳнат қилдик, дейди тикув корхонаси раҳбари. – Албатта, юртимиз иқлимини, об-ҳавони ҳам эътиборга олдик. Ҳайдовчилар учун тўқ ҳаво рангли кастюм-шим, кўйлак таклиф қилинди.

Очиғи, бу қарорга келишимизга кўплаб ҳайдовчиларнинг таклифлари ҳам сабаб бўлди. Ҳайдовчи автобусни бошқаришдан ташқари бот-бот транспортнинг техник ҳолатини ҳам кузатиб туришига тўғри келади, шу боис дастлабки танланган очиқ ҳаво рангдан кўра тўқроқ ранг танланди. Аммо, либослар жуда бежирим, бу йўловчиларга ҳам маъқул келади деб ўйлайман.

Чиптачилар учун эса оч кулранг нимчага тўхталдик. Икки ёнида чўнтак, бейжик учун мазсус жой, хуллас, бу ҳам чиптачилар учун жуда қулай.

Бундан ташқари “Тошавтотаъмирхизмат” унитар корхонаси ишчи-ходимлар – уста, чилангарлар учун ҳам ишларига мос хизмат либослари тикилади, бундан ташқари улар учун қишнинг совуқ фасларида асқотадиган махсус комбинизонлар ҳам тикамиз.

– Шундай экан, ушбу либосларни тикиш учун – ишни бошлаш учун шартномалар тузилганми, деган саволимизга Дилдора Туропова шундай жавоб берди, – Жорий йилнинг 10-15 январь кунлари барча автобус саройлари, “Тошавтотаъмирхизмат” УК билан шартнома имзолаб бўлганмиз.

Ҳисоб рақамимизга пул тушиши билан ишлар бошланиб кетади, дейди.

– Тикув корхонангиз ҳақидаям икки оғиз гапириб бериб, дея сўрадик.

– Корхонада айни пайтда 12 нафар тикувчи бор. Уларнинг ҳар бирини ўз ишининг усталари, деса бўлади. Қолаверса, улар синовдан ўтган намуна нусхаларни яратишда ҳам фаол қатнашишган, нима қилиш кераклигини яхши билишади.

Худо хоҳласа, ҳаммаси яхши бўлади, деган умиддаман.

А.КОМРОНБЕК суҳбатлашди

Payshanba, 30 Yanvar 2019

Ҳамкасблар ҳаётидан...

ЙЎЛОВЧИЛАР РОЗИЛИГИ КЎНГИЛГА ҚУВВАТ БАҒИШЛАЙДИ

ҳайдовчи билан суҳбат

Донишмандлар “Ўзгаларга яхшилик қилиб яшаш – олий саодатдур” дейишади.

Шу маънода жамоат транспорти ҳайдовчиларига ҳавас қилсак, арзийди. Боиси, улар ҳар куни эл – юрт хизматида. Ҳали кўпчилик уйқуда бўлган паллалар, тонг отар-отмас ювиниб, тараниб хизмат сари чоғланишади. Тегишли кўрик – назоратлардан ўтгач яхши ният билан йўналишга чиқишади. Турли ташвишлар билан бекатларда турган йўловчиларни олиб йўлга тушишади. Соғ-саломат ўз манзилларига етиб олган йўловчилар эса ўз манзилларига тушиб қолаётиб, “раҳмат, барака топинг, йўлингиз бехатар бўлсин” деб қолишади. Олқиш олиб яшаш қандай яхши. Ахир, ёмғир бўлиб ер, дуо билан эл кўкаради...

Дарҳақиқат, одамлар узоғини яқин қилиш, катта-кичикнинг дуосини олиб юриш ҳар кимга ҳам насиб қилавермайди.

Саҳифамизнинг бугунги меҳмони ана шундай ҳамкасбларимиздан.

“18-автобус саройи” МЧЖ ҳайдовчиси Равшан ака Содиқов. У транспорт соҳаси ходимларининг касб байрамлари арафасида бир гуруҳ ҳамкасбларимиз қатори жамоат транспорти тизимида узоқ йиллар қилган самарали меҳнати, ён-атрофидагиларига ўрнак бўлаётганлиги ва жамоат ишларидаги фаол иштироки учун “Тошшаҳартрансхизмат” акциядорлик жамиятининг “Тошкент шаҳар йўловчи ташиш транспорти Фахрий ходими” кўкрак нишони билан тақдирланди.

Равшан ака билан ўзи хизмат қилиб келаётган йўналиш, ютуқ ва муаммолар, бугунги кун ҳайдовчиси, ҳамкасблар ишончини қозониш, қолаверса, бугунги кун жамоат транспорти ҳайдовчиси хусусида суҳбатлашдик.

У 1967 йили Шайхонтоҳур туманида туғилган.

– Ўрта мактабни битириб тўғри ҳайдовчилик курсига – Чилонзор туманидаги “18-автобус саройи”га қарашли Ўқув комбинатига борганман, – дейди ўша дамларни эслаб у. “В”, “С” тоифаларини олиб энди бир ишнинг бошини тутай деб турганимда, ҳарбийга чақириб қолишди. Хизматдан қайтиб яна ўша Ўқув комбинатига бордим ва автобусчилик курсида ”Д” тоифа олиш учун бир ой ўқидим. Кейин иш бошладим.

– Бошланиши осон кечмагандир?

– Албатта. – Осон кечмади, сабаби, йўловчилар билан ишлаш, улар билан тил топиб кетиш, шошиб қолмаслик, қолаверса, сенга ишониб топширган автоулов назорати ҳам ўз зиммангда бўлишини билгач, масъулият юки босади.

– Бу – устоз ҳайдовчилар ўгити, тажрибасига суянадиган палла, шундай эмасми?

– Худди шундай, бир неча ой ёнларида юриб ҳақиқий ҳайдовчи ким, у ўзини қандай тутиши лозим ва шунга ўхшаш кўплаб ўзим учун қоронғи бўлган жиҳатларни Адҳам ака Азизовдан ўрганганман.

Ёш ишчи бой малакали, тажрибали ишчи-ходимлардан кўп нарсаларни ўрганишлари мумкин. Нафақат касбга оид муҳим нуқта – жиҳатларни, балки кундалик турмушга асқотадиган ҳаётий муҳим нарсаларни ҳам ўрганади. Бу жуда муҳимдир. Бундан ташқари, бугун автокорхоналаримизга янги, замонавий автобуслар кўплаб келтириляпти, ана шу транспорт воситаларидан унумли фойдаланиш, уни асраб-авайлаш, қолаверса, кўпчилик билан муомала қилиш яъни йўловчиларни рози қилиб хизмат кўрсатиш учун ҳам ҳар қандай янги ходим тажрибали устозлар мактабини ўташлари лозим бўлади. Жамоат транспорти тизими фаолияти, эртаси, табиийки, ёш кадрлар билан боғлиқ, шундай экан, бизда мавжуд бўлган анъанавий устоз-шогирдлик анъаналарини янада кучайтириш лозим, деб ўйлайман.

– Жамоат транспорти ҳайдовчисининг ўзига яраша масъулияти борлигини, демак, ҳали ишни бошамасданоқ ҳис эта бошладингиз.

– Худди шундай бўлган. – Албатта, ҳамма қатори ҳаяжон, қандайдир ҳадиклар бўлган. Катта-кичик, турли ёшдаги йўловчилар сиз бошқариб бораётган уловга чиқишади, уларни вақтида ўз манзилларига етказиб бориш бу сизнинг вазифангиз... Илк бор йўналишга чиққан кунларимни эслаганимда албатта устозим Адҳам ака ёдимга келаверади. Мен бу кишидан бир ҳайдовчи ўрганиши мумкин бўлган ҳамма нарсани ўрганганман. Жамоат транспорти ҳайдовчиси йўловчилар билан ўзини қандай тутиши кераклиги, ўзинг бошқараётган транспорт техник ҳолатидан бохабар бўлиб бориш, ҳайдовчининг бурчи ва масъулияти, ҳамма-ҳаммасини устоздан ўрганганман.

– Ишни қайси йўналишда бошлагансиз?

– Дастлаб 79-йўналишда ишладим, кейин 114- йўналишда ҳам ишладим. Шундай қилиб, аста-аста тажрибам ошиб борди.

– Айни пайтда Дўмбиробод Ўрикзор буюм бозори 125- йўналишда ишлаяпсиз.

– 20 йил бўлибди, шу йўналишдаман.

– Келинг, 125- йўналиш хусусида гаплашайлик.

– Йўналиш узунлиги 14, 8 км. бўлиб, ҳар кун 6та автобус йўналишга чиқади. Оралиқ масофа 15-17 дақиқа.

– Бундан 1,5-2 йил олдин ушбу йўналиш фаолияти бизнинг газетада танқид қилинган эди, эслайсизми?

– Эслайман.

– Танқид ўринсизмиди?

– Ўша пайтларда чиндан ҳам муаммолар бор эди, ҳозир кузатган бўлсангиз ундай эмас. Сабаби янги автобуслар келиши ҳисобига йўналишга қўшимча автобуслар ажратилди ва энди 125- йўналиш автобусини йўловчилар кутиб қолиш ҳолатлари кузатилмаяпти.

– Айни пайтда ҳам 125-йўналиш ҳайдовчиларини қийнаётган қандай муаммолар борми?

– Биласизми, муаммо шундаки, Ўрикзор бозори атрофида иккита маҳаллага кириб-чиқамиз, йўллар талабга жавоб бермайди, йўлнинг носозлиги транспорт воситаларининг, эҳтиёт қисмларнинг бот-бот ишдан чиқишига сабаб бўлади. Бундан ташқари Ўрикзор бозори атрофидаги тирбандлик, бекатларни хусусий уловлар томонидан банд қилиб туриш ҳолатлари ҳам ишимизга салбий таъсир кўрсатади. Шу боис, баъзида белгиланган жадвалдан кечикиб ёки вақтлироқ юришимизга тўғри келиб қолган ҳолатлар ҳам бўлади.

– Яна бир савол, кузатаётган бўлсангиз, ҳали ҳамон автобус ҳайдовчиларини кузатув камераларга тушиб қолаётган қоидабузарлар сафида кўраяпмиз.

– Ҳозир камайиб қолди. – Ҳайдовчи ҳушёрликни қўлдан бой берганда бундай ҳолатлар юз беради, ҳолбуки жамоат транспортини бошқараётган ҳайдовчининг бундай қилишга ҳаққи йўқ. Видеокамерага тушди дегани, бу – қоидани қўпол равишда бузди, дегани. Минг бор шукрки, йўналишимиз ҳайдовчилари бундай қоидабузарликка йўл қўйишаётгани йўқ.

– Бошда устоз-шогирд анъаналари ҳақида гапириб ўтдингиз, энди шогирдларингиз ҳақида ҳам гапириб берсангиз.

– Ўзим автокорхонага энди келган онларим ҳамиша ёдимда туради. Ёш ишчи-ходим тажрибали, бағри кенг устозлар қаноти остида ўзларини хотиржам ҳис этишади. Шу боис, ишга энди келган ёшларимизга йўл-йўриқ кўрсатиш, ҳайдовчилик сир-асрорларидан бохабар этиш тажрибали, малакали ишчиларнинг зиммасида вазифадир. Мен қариб 30 йилдан буён шу касбдаман. Демак, етарли малака, тажриба бор. Шогирдларим бор, улар турли йўналишларда меҳнат қилишади. Ҳозир ҳам уларга қўлдан келганча ёрдам бераман, йўл-йўриқ кўрсатаман.

–Йўловчилар билан хуш муомалада бўлиш ҳам ҳайдовчи учун муҳим, тўғрими?

– Нимасини айтасиз, йўловчи рози бўлса, биз ҳам яхши кайфиятда ишлаймиз. Шунинг учун йўловчилар розилигини олиш ҳар бир ҳайдовчининг асл мақсади. Мен ҳар қандай ҳолатда ҳам йўловчининг кўнглига қараш лозим, деб ўйлайман ва шундай йўл тутаман.

– Икки оғиз, оилангиз ҳақида ҳам гапирсангиз.

– Турмуш ўртоғим, 3 нафар фарзандим, 6 нафар набирам бор.

Мана 30 йилким шаҳримиз аҳолиси ва меҳмонларига хизмат қилиб келаётган, “Тошкент шаҳар йўловчи ташиш транспорти Фахрий ходими” кўкрак нишони соҳиби Равшан ака Содиқовга йўлингиз ҳамиша бехатар бўлсин, деб қоламиз.

А.КОМРОНБЕК суҳбатлашди

Chorshanba, 24 Yanvar 2019

“АҚЛЛИ ШАҲАР КОНЦЕПЦИЯСИ” ҲУКУМАТ ТОМОНИДАН ТАСДИҚЛАНДИ

Ахборот - технологиялари жадал ривожлангани сари кундалик турмушимизга ҳам ноу-хаус, янгиликларнинг тез суръатларда кириб келишига гувоҳ бўлиб бораяпмиз. Ана шундай тараққиёт меваларидан бири бу, шубҳасиз, «Ақлли шаҳар» ларнинг пайдо бўлиб бораётганидир.

Хўш, ақлли шаҳар, бу қандай шаҳар?

Табиийки, бу савол кўпчиликни қизиқтиради.

Шаҳар сўзининг ўзи барча қулайликларга эга макон, дегани. Уни ақллилашган кўриниши одамларга яна қандай қулайликлар яратиши мумкин?

Куни кеча Ўзбекистон ҳукумати «Ақлли шаҳар» технологияларини жорий этиш концепциясини тасдиқлаш тўғрисида қарор қабул қилди. Бу ҳақда Адлия вазирлигининг телеграмдаги «Ҳуқуқий ахборот» канали орқали хабар берилди.

Қарор билан «Ақлли шаҳар» технологияларини жорий этиш концепцияси ва 2019−2021 йилларда концепцияни амалга ошириш бўйича амалий тадбирлар режаси ҳам тасдиқланди.

Концепцияга кўра «ақлли транспорт», «ақлли таълим», «ақлли тиббиёт», «ақлли энергетика тизими», «ақлли қурилиш» «ақлли коммунал хўжалик», «ақлли уй», «ақлли ҳокимият», «ақлли маҳалла» каби лойиҳалар «Ақлли шаҳар» технологияларини жорий этишнинг асосий йўналишлари сифатида белгиланди.

Мазкур концепцияни ҳаётга татбиқ этишдан мақсад, илғор технологияларни шаҳарларимизга олиб кириш билан бирга аҳоли турмуш даражасини янада юқори поғоналарга кўтариш, бугунги ва келажак авлодни ижтимоий, иқтисодий, маданий ва шунга ўхшаш талоботларини қондиришдан иборат.

“Ақли шаҳар” консепциясида кўзда тутилган йўналишлар ичида энг муҳимларидан бири бу, шубҳасиз, “ақлли транспорт” масаласидир.

Маълумки, шаҳарларимизда аҳоли сони кундан кунга, йилдан йилга ортиб бормоқда. Ривожланган давлатларнинг аксариятида шаҳарларда истиқомат қиладиган аҳоли сони қишлоқлар яшаётган аҳолидан кўп ва бу табиий ҳол деб қаралади. Бу ҳолатни шаҳарларда кичик бизнесни ташкил этиш, хизмат кўрсатиш нуқталарида фаолият олиб бориш ва шунга ўхшаш ижобий ҳолатлар билан изоҳлаш мумкин. Куни кеча Ўзбекистонда Президент ташаббуси билан Урбанизация Агентлигининг ташкил этилиши ҳам шаҳар ва қишлоқларимиз ўртасидаги номутаносибликка барҳам беришга қаратилган. Шаҳарларда аҳоли сониннинг ортиб бориши билан табиийки транспорт воситалари ҳам ортиб бораверади. Бугун йирик шаҳарлардаги энг оммалашган ва ечимини топиш мушкул бўлган ”бошоғриқ” бу трапнспорт билан боғлиқ муаммолардир. Айниқса, эрталаблари ва кечқурунлари йўлларда тирбандликларнинг юзага келиши шаҳарликлар учун етарли ноқулайликлар келтириб чиқаради.

Мамлакатимиз пойтахти Тошкент шаҳрини оладиган бўлсак, биргина “Тошшаҳартрансхизмат” акциядорлик жамиятининг ўзидан 1000дан зиёд автобуслар йўловчиларга хизмат кўрсатади. Маълумки, жамоат транспорти қатъий жадвал асосида хизмат қилиши лозим. Транспорт воситаларининг ҳаддан зиёд кўплиги, жамоат транспорти воситалари юрадиган, тўхтайдиган жойлар кўп ҳолатларда бошқа транспорт воситалари билан банд қилинганлиги боис, жамоат транспорти ҳайдовчилари қийналишарди. Чунки, юқорида айтиб ўтилган камчиликлар кўп ҳолатларда жамоат транспорти воситаларини жадвал асосида ҳаракатланиш имконини бермасди. Энди қабул қилинган янги концепцияга кўра барча транспорт воситалари ва тизимлари, уларнинг ҳаракатлари бир бири билан узвий боғланади. Бундай уйғунлик йўлларда тўлиқ назорат ўрнатиш имкониятини яратади.

Умид қиламизки, шаҳримиз транспорт тизимида шу пайтгача кўзга ташланиб турган хунук ҳолатларга энди барҳам берилади.

Бундан ташқари, «ақлли таълим», «ақлли тиббиёт», «ақлли энергитика тизими», «ақлли қурилиш» «ақлли коммунал хўжалик», «ақлли уй», «ақлли ҳокимият», «ақлли маҳалла» каби лойиҳалар ҳам Тошкентни ҳавас қилса арзигулик шаҳарлар қаторига олиб чиқишга умид қиламиз.

А.НАРЗУЛЛОЕВ

Chorshanba, 24 Yanvar 2019
Page 1 of 27
Avtobus buyurtmasi
1062 Ishonch telefoni
mg.uz
my.gov.uz
tshtx.uz 

Foydali resurslar

edportal  fondbozori
gov.uz my.gov.uz
lex.uz cert.uz dc.uz
gis.uz strategy.gov.uz Ctrl+Enter

Aloqa uchun muloqotlar

Umumiy bo'lim
Tel.: (+998 71) 233-89-21
Faks: (+998 71) 233-34-40
Xorijiy hamkorlar bilan muloqot qilish uchun telefoni / Phone for communication with foreign partners: (+998 71) 233-52-63

Yangiliklarga obuna boling

Xozir saytda 1469 mehmon

Yandex.Metrika

 

Click to listen highlighted text! GSpeech